4 ka sugarol dakpan sa tigbakay sa Carmen
CEBU, Philippines — Gitanggong karon sa detention cell sa kapolisan sa Lungsod sa Carmen ang upat ka mga sugarol nga nadakpan nga nagpahigayon og tigbakay atol sa pagpangronda sa kapolisan diha sa Purok Lumboy, Barangay Lanipga sa nahisgutang lungsod.
Ang operasyon gihimo sa Provincial Intelligence Unit (PIU) Mobile Force Company ug kapolisan sa Lungsod sa Carmen niadtong Lunes Mayo 3, 2021.
Giila sa kapolisan ang ilang nadakpan nga mao sila si Arnel Escoton Banzon, 39 anyos nga taga Barangay Cantumog sa Lungsod sa Carmen. Vincent Abatayon Bejoc, 25 anyos nga molopyo sa Barangay Poblacion sa mao gihapong lungsod
Dugang nadakpan mao sila si Ain Banzon Damiles, 38 anyos nga taga Barangay Korte ug Crisanto Kyamko, 34 anyos nga taga Barangay Sac-an sa Lungsod sa Carmen.
Ang kapolisan miingon nga nakaeskapo ang duha nga maoy nagpasiugda atol sa maong pagpangronda apan maapil gihapon sila sa pasakaan og kaso sa higayon nga makuha nila ang ilang mga pangalan. (BANAT NEWS)
- Latest