Inmate nga nanghulga nakuhaan og cellphone

CEBU, Philippines — Priso nga giingong druglord ug gipasanginlang nanghulga sa kinabuhi sa hepe sa Integrity Monitoring and Enhancement Group Visayan Field Unit (IMEG-VFU) ug sa pamilya niini, gibuwag na sa jailwarden gikan sa ubang mga priso sa Cebu City Jail.

Una nang gibutyag ni Police Major Alejandro Batobalonos hepe sa IMEG-7 nga kini maong inmate nga maoy nagpaluyo sa mga hulga nga iyang nadawat.

Kining maong inmate gikatahong kapuyo ni Ritchie Nepomuceno kinsa gipatay duha ka semana na ang milabay. Si Nepomuceno mao ang reklamante batok sa 13 ka polis sa Sawang Calero Police Station sa Cebu City tungod sa matud pa robbery-extortion, torture ug rape.

Si Nepomuceno nidangop sa IMEG-7 hinungdan sa gihimong imbestigasyon hangtud nga girelibohan sa pwesto ang 13 ka polis nga gireklamo. Ang usa sa 13 ka polis naghikog sud sa Police Regional Office 7 tulo ka oras human nga gi-ambush patay si Nepomuceno sa Barangay Basak-Pardo. Matud pang Batobalonos, human sa pagkahitabo kang Nepomuceno gipasanginlan siya sa maong inmate nga maoy nagpapatay sa babaye.

Si Jail Superintendent Jose Abueva, warden sa Cebu City Jail sa pakighinabi kaniya miingon nga personal nga nakigalayon kanila si Batobalonos bahin sa pagpanghulga sa maong inmate. Gawas sa  motibo sa love triangle, gitan-aw usab sa pulisya ang pagkalambigitan sa ilegal nga druga nga posibleng motibo sa pagpatay kang Nepomuceno.

Ang pagpanghulga matud pa gipaagi sa social media hinungdan  sa kahibulong nila kun giunsa kini sa inmate nga bawal man ang gadgets sud sa CCJ. Tungod sa reklamo ni Batobalonos mihimo og surpresang operation greyhound si Abueva sa selda sa maong inmate ug dunay nakuhang cellphone, apan keypad lang kini, dili klase sa cellphone nga gamiton pang-social media. Si Abueva mihulagway sa maong inmate nga ordinaryo lang ug tigduyog sa mga relihiyosong kalihokan sa sud.

Gitug-an sab ni Abueva nga miangkon kining maong inmate nga giduaw kini kaniadto tuig 2019 ni Nepomuceno, apan gihimakak niyang managkapuyo sila.

“Amo gyud na siya giaksyonan. In fact, nasalang na na siya sa disciplinary board unya ang decision sa disciplinary board kay i-segregate siya para dili na siya makabuhat sa iyang alleged nga complaints nga sige siya og threat ni Major(Batobalonos),” matud ni Abueva. —IBM (BANATNEWS)