Dizon maningkamot mapatuman ang food bank sa siyudad

CEBU, Philippines — Gipasalig ni Konsehal Alvin Dizon nga magpadayon ang iyang komunikasyon ngadto sa executive department alang sa paghangyo nga i-implementar na ang food bank sa siyudad.

Samtang wala pa kini sugdi, mihimo og koordinasyon si Dizon sa nagkadaiyang organisasyon sa pag-umol og community pantries.

Gibutyag sa Chairman sa committee on social services sa Konseho sa Siyudad sa Sugbo nga si Konsehal Edu Rama nga mo-request siya sa committee on budget and finance nga palakipan gyud alang sa sunod nga supplemental budget ang food bank.

Giingong gamit kaayo kini gumikan kay daghan ang naglisod sa pandemya nga nanginahanglan gyud og pagkaon ilabi na kadtong nawad-an og trabaho.

Matud pa niya nga ang pag-establisar og food bank gikinahanglan sanglit magsilbi kini nga longterm nga counterpart sa mga nisulbong nga community pantries.

Kahinumdoman nga ang food bank ordinance gigama ni Dizon nga napasar sa konseho niadtong 2020. Tumong sa maong ordinansa nga walay magutman panahon sa trahedya o emerhensya.

Nagkanayon si Dizon nga gibuhat na kini sa ubang nasud ug epektibo ang maong sistema busa napamatud-an na nga usa kini sa mga lig-ong pamaagi  sa pag-alkontra sa kagutom. MEL (BANATNEWS)