Bentilasyon sud sa City Hall ipasusi

CEBU, Philippines — Giawhag sa Cebu City Council ang Office of the Mayor, pinaagi sa City Administrator, nga mohimo og inspeksyon sa matag opisina sa kagamhanan sa syudad aron mahibal-an kung ang kalidad sa bentilasyon sa mga opisina o lugar sa trabahoan nunot sa peligrong pagkaylap sa COVID-19 .

Gihangyo usab sa City Council ang City Administrator nga ikunsiderar ang mga guidelines sa Department of Labor and Employment (DOLE) Department Order No. 224 sa pag-improve ug pagpadayon sa kalidad sa bentilasyon sa mga opisina o trabahoan aron mas mapanalipdan ang mga kawani ug kliyente sa siyudad. Si Konsehal Raul Alcoseba niduso og usa ka resolusyon bahin niini ug kini daling giaprobahan sa City Council niadtong Miyerkules.

“This representation believes that the rationale and guidelines of the said order may be adopted by the Cebu City Government to prevent the spread of COVID-19,” sigun ni Alcoseba.

Ang DOLE miisyu sa Department Order No. 224 o Guidelines on Ventilation for Workplaces and Public Transport to Prevent and Control the Spread of COVID-19, nga naglangkob sa tanan nga mga komersyal ug pang-industriya nga mga establisamento, proyekto, lugar, ug tanan nga ubang mga lugar diin ang trabaho gihimo sa sulod.

Ang Seksyon 1 nag-ingon nga ang  kinahanglang adunay paigong bentilasyon o kahungawan sa hangin ug masudlan og preskong hangin ang mga buhatan sanglit usa kini sa mga pamaagi paglikay sa pagkaylap sa COVID-19. Apil sa kinahanglang dunay kahuwangan mao ang non-airconditioned space, air-conditioned space, local exhaust ventilation (LEV),  mga kasilyas aron kanunay nga presko ang hangin.  Sa datos nga gipagawas sa Department of Health Central Visayas niadtong Abril 30, 2021, adlaw’ng Biyernes ang active cases sa Cebu City naa sa 850.

Nakatala ang siyudad og 59 ka bag-ong kaso samtang 27 ang dugang nangaayo ug dunay usa nga napuno sa listahan sa mga nakalas. —Decemay P. Padilla/IBM (BANATNEWS)