Mga contractor sa Probinsiya sa Sugbo gibaharan ni Garcia

CEBU, Philippines — Gihatagan og tagal hangtud sa Mayo 5, 2021 sa Probinsiya sa Sugbo ang mga contractor nga nagtrabaho sa mga road concreting project niini aron matrabaho ang ilang mga delayed.

Ug kong dili kini makatuman sa gihatag nga panahon panahon kanila i-terminate sa Kapitolyo ang ilang kontrata.

Atol sa tigom ni Gobernador Gwendolyn Garcia tali sa nagkadaiyang contractor nipahimangno kini nga dili usab siya ganahan nga adunay subcontracting nga mahitabo tungod kay makaapekto kini integridad sa construction.

“Ipaapil na nako sa mga requirement nato. Kay kon inyong ipagamit inyong lisensiya, automatic ipa-disqualify ta mo", bahad ni Garcia.

Si Garcia nagkanayon nga tungod sa pagkalangay pagtrabaho sa mga contractor nalangay usab ang schedule nga matapos ang mga proyekto sa imprastraktura sama sa road concreting project sa mga barangay ug provincial roads

“Kamo lay nakalangan ani, mosugod na ra ba ta’s atong 2021 projects. Paningkamoti na nga maka-catch up mo. Kon dili ninyo ipagamit inyong lisensiya,maayo mo’g performance”, matud ni Garcia.

Gibutyag sa Provincial Engineering's Office nga anaa na sa P4.3 bilyones ang napatuman nga infrastructure project sa Probinsya sa Sugbo kon diin P6 bilyones ang nagahin sa tuig 2020.

Kaniadto si Garcia nihatag kini og lugyaw sa panahon sa mga contractor pagpaspas sa ilang trabaho tungod kay enhanced community quarantine pa ang probinsiya apan karon giingong wala nay igong rason ang mga contractor aron maglangay tungod kay ubos na sa MGCQ ang probinsiya. —BDB (BANATNEWS)