Pagpamakuna sa mga seniors sa Mandaue gisugdan na

CEBU, Philippines — Gisugdan kagahapon sa buntag Abril 21, 2021 ang pagbakuna batok coronavirus disease sa mga senior citizen sa Dakbayan sa Mandaue.

Si Subangdaku Barangay Kapitan Ernie Manatad nga maoy chairman sa city's COVID -19 vaccine board, miingon nga ang mga senior citizens nga gikan sa iyang barangay maoy labing unang gibakunahan.

Ang mga senior citizen gi-anam-anam lang pagkuha gikan sa ilang barangay hall sa Subangdaku ug gidala ngadto sa Mandaue City Cultural and Sports Complex sa Sitio Tribunal sa Barangay Centro nga maoy vaccination area.

Dugang pa ni Manatad nga human bakunahe, ang maong mga senior citizen kuhaon kini og balik sa giandam nilang sakyanan ug ihatod og balik ngadto sa ilang barangay hall.

Samtang gipaspasan sa Dakbayan sa Talisay ang pagpanglista sa mga tawo nga mabakunahan batok COVID-19.

Si Mayor Gerald Anthony “Samsam” Gullas Jr. nagkanayon nga gawas sa paspas mas klaro sab ang pagpanglista sa mga tawo sa matag barangay.

Iyang gipatawag ang mga kapitan ug ang Sangguniang Kabataan (SK) aron motabang sila sa pagpanglista.

Sa pagkakaron, miabot na sa 1,500 ka mga senior citizen ang andam magpabakuna samtang padayon ang ilang paglista sa mga nalakip sa A3 o ang mga tawo nga adunay daan nga gipamati sa ilang lawas.

Nalipay si Gullas gumikan sa gipakitang aksyon sa mga opisyales sa matag barangay.

Sa pagkakaron, ilang gipaningkamotan nga mahuman og dali ang pagpamakuna sa A2 aron molahos na sila sa A3 samtang padayon pa ang ayuda nga bakuna gikan sa nasudnong kagamhanan. —Gabriel C. Bonjoc/MEL (BANATNEWS)