Hunta Probinsyal nagbangutan sa kamatayon ni Sitoy
CEBU, Philippines — Nagbangutan usab karon ang Hunta Probinsyal tungod sa kamatayon ni Presidential Legislative Liaison Office Secretary Adelino “Addy” Sitoy ug nipadangat og pahasubo sa pamilya niini.
Atol sa ilang regular session mipadangat og resolusyon sila si bokal Glenn Anthony Soco ug Jovito Thadeo “Jonkie” Ouano nga gipasar sa provincial board nga naghatag og pag-ila ni Sitoy nga dili lang angayan nga ipasigardo sa taga Cordova kun dili lakip na sa Probinsya sa Sugbo.
“The late secretary is a pillar not just to the politics in Cordova but to our beloved Province of Cebu. The purpose of the resolution is to also give light on what we should remember him for,” matud ni Soco.
Si Sitoy nitaliwan niadtong Abril 15 sa edad nga 85-anyos.
Ang abo ni Sitoy anaa sa iyang payag residence sa barangay Gabi Cordova diin adunay misa matag alas 7:30 sa gabii gikan niadtong Abril 16, hangtod Abril 23, 2021.
Ang necrological service gikatakda karong Biyernes Abril 23, ug dalhon kini sa Cordova Municipal Hall karong Sabado, Abril 24, 2021.
Ang pamilya ni Sitoy modala sa iyang abo aron ipahiluna sa kataposang pahulayan karong Domingo ala una sa hapon adto sa Sitoy Musoleum nga nahimutang sa public cemetery sa Barangay Cogon Cordova. —MEL (BANATNEWS)
- Latest
