Mga sakop sa armadong kusog gipasidunggan sa Talisay

CEBU, Philippines — Gipasidunggan sa Dakbayan sa Talisay ang mga sakop sa armadong kusog sa nasud kinsa nakatabang sa pakigbatok sa COVID-19.

Si Mayor Gerald Anthony “Samsam” Gullas Jr. maoy nangulo sa paghatag og pasidungog sa mga sakop sa Philippine Army, Navy, Coastguard ug Marines.

Siya nitataw nga dako kaayo sila og natabang sa Talisay ilabi na sa panahon nga nag-lockdown.

Aduna may estrikto nga protocol apan siya nipasabot nga para lang kini sa tanan aron kapugngan ang pagkuyanap sa coronavirus disease.

Si Regional Director Ronnie Montejo nipasalamat sa iyang mga kauban sa buhat sa padayon nga pagserbisyo sa katawhan bisan paman sa hulga sa makamatay nga sakit.

Iya sab nga gipasalamatan si Gullas kinsa niila sa kahago sa mga uniformed personnel aron ang magpabilin ang ilang moral.

Si Gullas niingon nga wala pa gyud sila matapos sa ilang gubat batok sa COVID-19 busa siya nihangyo nga tabangan gihapon sila sa umaabot nga mga adlaw ug buwan samtang naghinay-hinay sa pagdawat ang katawhan sa pagpuyo nga naa ang virus sa palibot. —MEL (BANATNEWS)