Mga brgy tanod sa Lapu-Lapu nakabaton og libreng uniporme

CEBU, Philippines — Nakabaton og libre nga uniporme ang tanan nga mga barangay tanod sa 30 ka barangay sa Dakbayan sa Lapu-Lapu nga gilangkoban sa 11 ka barangay sa Isla sa Olango ug 19 ka barangay ang mainland sa maong dakbayan.                                     

Si Garry Lao, executive director sa City of Lapu-Lapu Office of Substance Abuse Prevention (CLOSAP) miingon nga natigayon ang paghatag og libre nga uniporme ngadto sa mga barangay sa dakbayan pinaagi usab sa pag-request nga gihimo sa ilang buhatan.                                     

Matud pa niya nga iyang nakita ang kamahinungdanon nga magsul-ob og uniporme ang mga barangay tanod sanglit sila man ang gitahasan sa pagpatuman sa kahapsay ug kalinaw sa ilang barangay.                 

Dugang pa niya nga dako usab og natampo ang mga barangay tanod sa gihingusgan nilang kampanya batok sa ilegal nga drugas sa kabarangayan.  

Duha ka matang sa uniporme ang naangkon sa mga barangay tanod ug kini mao ang type A ug type B nga uniporme.   

Si Mayor Junard Ahong Chan kinsa mitambong usab sa gihimo nga pagpag-apod-apod sa mga uniporme diha sa covered court sa Barangay Poblacion miingon nga unang higayon nga nakabaton og libre nga uniporme ang tanan nga mga barangay tanod nga gihatag gikan sa lokal nga kagamhanan.                           

Matud ni Mayor Chan nga nagdawat usab og allowance nga P500 ang matag barangay tanod ug tinguha niya kini nga pausbawan sa umaabot nga mga adlaw. —MEL (BANATNEWS)