CEBU, Philippines — Gidasig ni Mayor Gerald Anthony “Samsam” Gullas Jr. sa Syudad sa Talisay ang katawhan nga magpabakuna gyud batok coronavirus disease.
Kini bisan paman sa nahitabong pagkamatay ni Sydney Rose Panimdim, 36 anyos nga taga sitio Rattan, Barangay Tanke, Dakbayan sa Talisay niadtong Dominggo.
Ang namatay nagbilin og suwat nga nag ingon nga gusto pa siya nga magpakabuhi sa kalibutan aron matagaan og kaharuhay ang iyang pamilya.
Apan sa dihang siya nabakunahan sa Sinovac niadtong Marso 9 nitukar pagbalik ang iyang hubak ug nigrabe kini pagka Abril 9 sa dihang giturokan sa ikaduhang dose hangtud siya namatay.
Ang pamilya ni Panimdim niingon nga batasan sa namatay nga motago sa iyang mga sakit aron lang ang nahabilin dili na maglain ang huna-huna.
Si Gullas mibisita sa panimay ni Panimdim ug mihatag og hinabang sa pamilya.
Ang pamilya ni Panimdim nipili nga dili nalang hilabtan ang iyang patay nga lawas ug dawaton nalang ang nahitabo.
Apan si Gullas niingon nga mas maayo gyud nga paaboton ang imbistigasyon sa Department of Health (DOH).
Nidugang si Gullas nga dili man pinugsanay ang magpabakuna apan mas maayo gyud nga itug-an ang tanang gipamati sa lawas aron masigurado. MEL (BANATNEWS)