Pagsikop sa smoke belchers gipangusgan
CEBU, Philippines — Gihingusgan karon sa Cebu City Transportation Office (CCTO) ang ilang kampanya sa pagukod og mga sakyanan nga nagbugwak og itom nga aso tungod sa polusyong gibilin niini sa kahanginan.
Sa unang kwarter ning tuiga, dul-an na sa 500 ka sakyanan nga nasakpang nagbugwak og itom nga aso ang ilang gisikop ug gipamulta.
Tumong sa CCTO nga maprotektahan ang panglawas sa mga tawo ingon man usab ang mamentinar ang kalimpyo sa kalikopan.
Sumala pa sa CCTO Deputy Chief of Operations ug information officer sa maong departamento nga si Paul Gotiong, gipangusgan na nila karon ang mga surpresang operasyon diha sa kadalanan sa siyudad aron paggukod aning mga sakyanang nagbugwak og itom nga aso.
Kasagaran sa ilang nasita mga delivery trucks. Matud pa ang kalapasan sa City Ordinance No. 2111 o ang “Anti-Smoke Belching Ordinance of the City of Cebu” adunay multa nga P500.
Giawhag ni Gotiong ang mga motorista nga motuman nalang gyud sanglit alang sa raman usab kini sa kaluwasan sa panglawas sa mga tawo.
Sa pagtuman niini , mapagkang ang problema sa polusyon sa hangin nahimo nga usa ka daku nga problema labi na sa usa ka highly-urbanized na siyudad.
Usa sa nakatampo niini mao ang aso gikan sa mga pabrika ug mga kagang-kagang nga mga sakyanan o kadtong mga depektoso na og makina nga sakyanan nga mahimo rang ipaayo kung responsable ug nagpakabana sa kalikopan ug sa uban ang mga tagiya.
“Sayod man kita nga makadaot sa atong panglawas og sa kalikupan ang maong itom nga aso nga gibulhot sa mga tambutso ,busa awhag namo sa mga motorista nga atimanon pud nila ang ilang mga sakyanan para dili makapurwesyo sa uban,”tipik sa statement sa CCTO nga namantala sa ilang Facebook Page. —IBM (BANATNEWS)
- Latest