LTO-7 mipasaka’g kaso sa dealer og motor

CEBU, Philippines — Mga opisyal ug kawani sa usa ka dealer og motorsiklo ang girekomendar sa Office of the City Prosecutor sa Mandaue City nga pasakaan og siyam ka kasong falsification of commercial documents.

Kini may koneksyon sa kasong gipasaka ni Land Transportation Office-7 represented by its regional director Victor Caindec batok sa Des Strong Motors Inc.

“Wherefore, premises considered, it is respectively recommended that an Information for nine (9) counts of falsification of commercial

documents by private individual under Article 172 paragraph 1 of the Revised Penal Code be filed in Court,” matud pa sa  usa sa bahin sa siyam ka pahinang resolusyon sa piskalya.

Ang mga gipasakaan og kaso mao ang lima ka empleyado sa DSMI sa Briones Highway Mandaue City Branch. Apil sa ilang gikasohan ang presidente sa kompanya, ilang corporate secretary ug uban pa.

Ang gipasakaang mga kawani sa maong branch naglakip sa branch manager ug area manager ingon man ang giingong mga otorisadong representante sa maong kompanya sa mga transaksyon diha sa LTO bahin sa pagproseso sa ilang sales reporting gamit ang “Do-It-Yourself” system.

Si Caindec miduso sa maong kaso human nga si LTO assistant secretary Edgar Galvez mihatag kaniya og otorisasyon niadtong Oktubre 2020 sa pagpasaka sa maong kaso ngadto sa korte.

Matud pang Caindec,  ang mga gikasohan nagkunsabohay sa pagtikas sa maong mga dokumento nga ilang gi-upload pinaagi sa “Do-It-Yourself” system.

Sumala pa sa director dunay iregularidad sa mga petsa ang ilang actual sales invoices, official receipts ug delivery receipts nga gihatag ngadto sa ilang mga kustomer kun itandi sa duplicate copy sa sales invoices nga gibilin diha sa DSMI.

Matud pa nga nasakpan kining iregularidad human nga gisita sa LTO enforcer ang usa ka Nick Salaritan niadtong Marso 6, 2020 atol sa pagsusi sa mga dokumento niini.

Sumala pa nga base sales invoice, ang motorsiklo nahalin og P119 mil didto sa DSMI Toledo City Branch niadtong Disyembre 19, 2019 apan sa gi-upload nilang dokumento sa “Do-It-Yourself” system giingong nahalin ang motor niadtong Pebrero 10, 2020 sa kantidad nga P155 mil sa DSMI Mandaue Branch.

Gawas sa maong sales invoice, duna pay laing walo ka mga susama niini ang nadiskubrehan atol sa on-site inspection sa LTO-7 diha sa ilang branch sa Mandaue.

Apan ang mga gipasakaan sa ilang tubag sa kaso pinaagi sa ilang abogado miinsister nga inosente sila sa mga gipasangil kanila.

Matud pa nga wala silay tulubagon tagsa-tagsa sa mga gipasangil nganha kanila. Nangangkon sab silang way otorisasyon sa kalihim sa Department of Transportation si Caindec aron pasakaan sila og kaso, gipasangil sab nila nga ilegal ang pagsakmit sa ilang mga dokumento, gihulagway nilang dili prosekusyon kondili persekusyon ang gihimo kanila.

Ang maong resolusyon nga gipetsahan Marso 15, 2021 gipirmahan ni Associate City Prosecutor Anna Marie Yap ug giaprubahan kini ni City Prosecutor  Mary Francis Daquipil tungod matud pa nakita nila nga dunay mga elemento nga mabasihan sa pagsang-at sa kaso.— The Freeman/IBM