DPWH gikatakdang magtukod og mga flyover

CEBU, Philippines — Gipahigayon na kagahapon ang unang hugna sa public consultation alang sa umaabot mga proyekto sa Department of Public Works and Highways (DPWH) nga naglangkub sa giplano nga flyover.

Ang nahisgutang giplano nga flyover maggikan diha sa Osmeña Boulevard  ngadto sa Leon Kilat Street, laing flyover sa N. Bacalso ngadto sa V. Rama Street ug underpass sa usa ka portion sa South Road Properties ngadto sa Mambaling road junction.

Matud sa section head for highway sa Planning Design Division sa DPWH-7 Engineer Joshua Monsanto nga nagpadayon  pa ang mga pagtuon ug survey alang sa maong plano .

Ang consultancy firm nga CEDCO Engineers maoy mogama sa detailed engineering design (DED) alang sa nahisgotan mga proyekto.

Matud ni Monsanto nga adunay alokasyon ang DPWH alang sa DED.

Nasayran nga nikabat sa P105 milyones ang budget alang sa DED sa maong mga proyekto nga gilangkuban sa mga survey, pagtuon ug sa mga konsultasyon.

Giingong dili pa matino ang kantidad sa kinatibuk-ang budget sa maong proyekto tungod kay nagpadayon pa ang pagtuon niini.

Samtang si Engineer Leah Negre, representante sa CEDCO Engineers nipadayag nga karong buwan sa Agosto pa niining tuiga mahuman ang mga pagtuon. Ang resulta sa mga pagtuon ug survey ilaha kining iduso ngadto sa DPWH alang sa final nga paghukom.

Nalakip usab sa plano ang papalapad og 2.5 meters sa dalan nga tukoran sa mga giplano nga flyover. —BDB (BANATNEWS)