PWD sa Cebu City makadawat og hinabang
CEBU, Philippines — Gipahibalo kagahapon ni Mayor Edgardo Labella nga madawat na sa mga person with disability (PWD) sugod karong Mayo 8, 2021 ang ilang nahabilin nga financial assistance gikan sa kagamhanan sa siyudad.
Madawat sa mga PWD ang lima ka buwan nga hatagan sa siyudad nga nikabat ngadto sa P5,000 diin sugod kini sa buwan sa Enero hangtud sa Mayo.
Gipahibawo usab ni Labella nga house-to-house ang pagpanghatag sa hinabang sa PWD aron mapatuman gyud ang health protocols.
Base sa talaan sa Department of Social Welfare and Services (DSWS) ang siyudad aduna kini kapin sa 11,000 nga beneficiaries nga PWD.
Nasayran nga sa niaging buwan naapod-apod na ang financial assistance alang sa kapin sa 80,000 ka rehistradong senior citizens sa siyudad.
Sa laing bahin, nakadawat na sa ilang pinansyal nga ayuda ang mga senior citizen sa Dakbayan sa Talisay sugod kagahapon.
Nasayran usab nga ang matag senior citizen nga rehistrado sa siyudad nakadawat og P1,500 matag usa kanila.
Ang opisyales sa matag barangay ang nipahiluna sa pagpang apod-apod sa ayuda.
Si kapitan Edward Alesna sa Barangay Poblacion nagkanayon nga ilang gipili ang luna diha sa Santa Teresa de Avila Parish nga maoy pahigayonan sa pagpanghatag aron matuman ang health protocols.
Matud ni Alesna nga dili angayang mabalaka ang mga senior citizen nga wala makakuha sa ilang ayuda tungod kay mosuroy ang ilang mga sakop diha sa mga balay sa mga senior citizen nga wala makadawat sa ilang ayuda.
Gawas sa kwarta gihatagan usab og mga bitamina ang mga senior citizen. —Gabriel C. Bonjoc/BDB (BANATNEWS)
- Latest