No Parking zone palibot sa Basilica ug City Hall
CEBU, Philippines — Ang Cebu City Transportation Office nipagawas og traffic advisory bahin sa mga kausaban palibot sa Basilica Minore del Sto. Niño ug sa Cebu City Hall tungod sa dakong kalihokang mahitabo karong adlawa kabahin sa ika-500 Years of Christianity sa Pilipinas, dunay mga lugar sa siyudad sa Sugbo nga temporaryong himoong parking area alang sa mga bisita nga motambong.
Tumong niini nga mahatagan og kahapsay ang agianan sa mga partisipante ug bisita sa maong kalihokan.
Gideklarar nga ang palibot sa Basilica Minore Del Santo Nino de Cebu ug City Hall “No Parking Zone.”
Suma pa sa CCTO nga i-clamp gyud nila ang mga sakyanan nga gipataka lang og babag.
“Ang mga partisipante ug bisita lang nga adunay car pass ug imbitasyon ang gitugotan. Wala’y ID. Wala’y Entry,” tipik sa advisory sa CCTO.
Gipahimagnoan nila ang mga motorista mga mangita og alternatibong agianan sanglit sirado gyud ang mga dalan nga nagpalibot sa City Hall ug Basilica.
Gipahimagnoan sab ang tanan nga mga sakyanan sa mga partisipante nga mag-park sa SM City Seaside o Robinsons Galleria Cebu. Adunay mga bus nga mo-transport kanila paingon sa Plaza Sugbo.
Samtang sa laing bahin, gipahibalo usab sa pangulo sa Prevention, Restoration, Order, Beautification and Enhancement (PROBE) team nga si Raquel Arce nga wala lang una nila tugti nga makapamaligya karong aldawa ang gatosan ka vendors nga nagpalibot sa Basilica aron masiguro nga dili maghuot ang maong lugar.
Ang mga mosupak niini wagtangon ang ilang prebilehiyo nga makapamaligya sa regular nga mga adlaw.
Gipahibalo sab ni Cebu City Market Administrator Irvin Cabales usa sa lugar nga himoong nilang parkingan mao ang dalan ML Quezon duol sa Carbon Public Market.
Mahimo sab gamiton isip parkingan ang Warwick Barracks kun pananglitan daghan gyud kaayo ang mga manambong.
Ang Market Operations Division dunay 105 ka mga enforcers nga motabang sa pagkontrol sa lihok sa mga tawo ingon man sa mga sakyanan aron hapsay ang kalihukan ug dili makamugna og kahuot sa dagan sa trapiko.
Sa kalihukan karong adlawa dunay mga vendors nga dili makatinda una, sama mga manindahay sa tumoy nga bahin sa dalan Magallanes ug kining mga karomata.— Decemay Padilla/IBM (BANATNEWS)
- Latest