P20.4 milyones shabu nasakmit, suspek napusilan patay
CEBU, Philippines — Mokabat sa P20.4 milyones nga balor sa gituohang illegal nga drugas ang nasakmit apan napatay sab ang subject sa buybust operation nga gipasiugdahan sa Provincial Intelligence Unit (PIU-PDEU CPPO) pinangulohan ni Provincial Director Police Lt. Col. Robert Lingbawan kagahapong sa kaadlawon diha sa Barangay Catarman, Lunsod sa Cordova.
Giila ang suspetsado mao si Joven Engalan Silong , residente sa Sitio Mahayay 2, Brgy Pasil, Siyudad sa Sugbo.
Matud ni Lingbawan nga 10 kilos matag semana ang ma dispose niini. Matud pa niya gikan sa Mindanao ang supply sa suspek nga gisakay og barko paingon sa Dakbayan sa Sugbo .
Giingong gikan sa National Bilibid Prisons ang kontak sa suspetsado ug siya ra usab ang mo dispose niini.
Atol sa operasyon gikatahong nakabantay ang suspetasado nga polis iyang kaatubang ug milanit kini sa iyang dalang kalibre .45 nga pistola.
Apan naunhan kini sa mga operatiba ug naigo sa nagkadaiyang parte sa kalawasan nga nakaingon sa iyang kamatayon.
Nakuha gikan sa dala niining bag ang gibanabana nga tulo ka kilong gidudahang shabu nga mobalor og P20.4 milyones, motorsiklo nga maoy gigamit sa suspetsado.— IBM (BANATNEWS)
- Latest