Liquor ban, curfew nakatampo pagpakubos sa mga kaso

CEBU, Philippines — Gikalipay sa mga opisyales sa kagamhanan sa Siyudad sa Sugbo ug kapulisan sa dakbayan ang padayon nga pagkunhod sa kaso coronavirus Disease (COVID)-2019 sa dakbayan.

Base sa pamahayag ni Cebu City Councilor Joel Garganera, Deputy Chief Implementer for Inter-Agency Task Force Emergency Operations Center Cebu City sa pagsugod ning tuiga katapusan nga nakatala ang Cebu City og pinakaubos nga kaso sa COVID-19 niadtong Enero 1.

Gumikan sa taas nga bakasyon niadtong buwan sa Disyembre sa miaging tuig hinay-hinay nga mibalik og saka ang mga kaso sa siyudad. Gani naay adlaw nga niabot og tag-three digits ang natala nga bag-ong kaso.

Apan niadtong Domingo, Abril 11, 2021 base sa datos sa Department of Health Central Visayas naa lang sa 21 ka bag-ong kaso sa siyudad. 

Nagtuo si Garganera nga bunga kini sa pagtuman sa katawhan sa basic health protocols.

“We in the EOC, the City of Cebu and Police we can only do so much, I would say I would like to give it to Cebuanos, they are really cooperating because no matter what we do, bisan unsay buhaton namo if di mo-cooperate ang tawo although on the other side naa tay police, K.A.S.A.L.I.G.A.N, Probe who is enforcing but then again makita nato ang atong gipang-apprehend para sa mga nagkadaiyang violations sa pandemya nagkaanam og kagamay so this is very good,” asoy ni Garganera.

Sayo ning tuiga gibalik ni Mayor Edgardo Labella ang liquor ban tungod sa pagsaka sa mga kaso. Kini gihangop sa kapolisan tungod kay nagtuo silang dako og natampo pagkontrol sa gidaghanon sa mga kaso ang liquor ban ug ang curfew.

Si Lt. Col. Wilbert Parilla, Deputy City Director for Operations sa Cebu City Police Office bisan og hinay-hinay nga miubos ang kaso mas maayo ipadayon ang liquor ban.

“Yes padayon lang gihapon kay kung inyohang makita before na nibalik og double or triple ang digit nato is we have already reached nga tag six or tag ten nalang ang atoang positive cases before but nikalit nalang og balik because ni-relax og gamay. Naay mga activities nga naka cause so karon mao na ato na gyud i-maintain nga dili nata gusto nga mobalik pa og taas ang atoang positive cases,” dugang ni Parilla.

Gawas sa CCPO ang Department of Health Central Visayas ingon man ang Emergency Operations Center (EOC) mirekomendar nga ipibalin gihapon ang liquor ban sa dakbayan. — IBM (BANATNEWS)