Paglibkas sa liquor ban tun- an pa ni Labella

CEBU, Philippines — Cebu City Mayor Edgardo Labella mihangyo sa mga magpapatigayon ingon man sa katawhan nga hatagan siya og duha ka semana aron tun-an kun angayan na bang libkason ang gipatuman nga liquor ban dinhi sa Siyudad sa Sugbo.

Suma pa sa mayor nga bisan og niubos na ang kaso sa COVID-19 dinhi sa dakbayan apan dili maayo nga magdali dali sa pag-desisyon ug kinahanglan una kini nga ma-evaluate.

Gidugang ni Mayor Labella nga nakatabang ang pagpatuman sa liquor ban tungod kay dili malikayan panahon nga dunay mag-inom nga magtagay og baso ug anaa ang panag-estorya nga moresulta sa pagtalsik sa laway nga posibleng hinungdan sa pagkatap sa virus.

Lakip sa dili pa mahimong tugtan pagbalik mao ang sabong kun tigbakay nga posibleng makamugna og paghugop sa mga tawo.

Samtang ang Department of Health Central Visayas DOH-7 dili morekomendar nga ilibkas na ang liquor ban ug tugtan ang sabong bisan ug nikubos na ang kaso sa COVID-19 ilabi na kay gamay pa lang ang nabakunahan.

Suma pa ni Dr. Mary Jean Loreche, ang tigpamaba sa DOH-7 nga dili pa karon ang panahon og matud pa sayo pa nga modesisyon kabahin niini.

Gitataw ni Loreche nga sa milabay nga mga adlaw tungod sa holiday walay gihimong testing sa COVID-19 ang ilang ahensya ug gamay lang usab ang ilang samples.

Dugang pa ni Loreche, paaboton nila ang umaabot nga lima ngadto sa pito ka adlaw nga resulta ug kung mag stabilize ba gayud ang kaso ug wala nay pagsaka. —MEL (BANATNEWS)