45 ka mag-uuma sa Cebu City nakadawat og tseke sa PCIC
CEBU, Philippines — Nikabat ngadto sa P375,000 ang kinatibuk-ang kantidad sa tseke nga giapod-apod ngadto sa 45 ka mag-uuma diha sa nagkadaiyang bukirang barangay nga na-insured sa Philippine Crop Insurance Corp.
Ang mga tamnanan sa maong mga mag-uuma ang naapektohan sa nagkadaiyang kalamidad.
Si Konsehal Phillip Zafra kinsa, chairman sa committee on agriculture sa konseho sa Dakbayan sa Sugbo ang nitambong sa maong kalihokan.
Sayo pa, Si Joey Baclayon, city agriculturist nipadayag nga nitabang sila og facilitate sa mga mag-uuma sa siyudad aron ma-enroll kini sa PCIC ilabi na nga dili matagna ang dagan sa panahon.
Nasayran nga adunay mga higayon nga apektado ang mga gipangtanom sa mag-uuma tungod sa kusog nga bagyo.
Gibutyag ni Baclayon nga kapin sa 8,000 ka mag-uuma sa siyudad ang narehistro sa PCIC.
Ang city agriculture padayon kini sa paghatag og lecture o mga seminar ngadto sa mga mag-uuma ug pipila niini ang gitabangan nila sa ubang mga pamaagi sa pag-atiman sa ilang mga produkto.
Ug bisan pa sa pademiya padayon gihapon ang mga mag-uuma sa ilang panginabuhian. BDB (BANATNEWS)
- Latest
