Mga vendor sa Carbon gipatawag pagpangandam sa Semana Santa

CEBU, Philippines — Ang Cebu City Market Operations Division adunay gihimong pagpangandam aron dili na masubli ang nahitabo sa niaging tuig diin nagdasok ang mga tawo nga mamalit og sagol sa benignit diha sa Carbon Public Market.

Ang lugar nga gitumbok nga hotspot tungod sa maong hitabo gipatawag sa Market Operation Division ang mga vendor sa maong lugar aron masultian nga sila ang mo-take charge sa lugar tungod kay sila ang naa sa dapit.

Matud ni Irvin Cabales, market administrator nga giawhag nila ang mga manindahay nga imentinar ang health protocols ug giandam na usab ang ilang mga enforcer panagana kong maghuot ang lugar.

Gibutyag ni Cabales nga sa dili pa ang Semana Santa ang ilang plano mao nga pahugtan ang mga entrance aron makontrolar ang mga mosulod.

Ang mga tindahan nga dili mamati sa hangyo og badlong irekomendar kini nga ipasirado.

Awhag usab ni Cabales sa katawhan nga mas maayo nga mamalit daan og mga sagol alang sa ilang iandam subay sa kasaulogan sa Semana Santa aron malikayan ang pagsugwak sa daghang tawo.

Subay sa Semana Santa, ang Cebu City Police Office(CCPO) hugot usab nga nakig-alayon sa Market Operations Division aron makontrolar ang pagsulod unya sa mga tawo sa merkado ilabi na diha sa Carbon Public Market. “We are implementing good system na sa Carbon Market so we will implement the same and perhaps we will just put additional personnel para makita sa mga tawo”, matud ni Police Colonel Josefino Ligan, director sa CCPO. BDB (BANATNEWS)