Drayber sa trisikol gipusil patay

CEBU, Philippines — Patay ang usa ka 25 anyos nga tricycle driver human gipusil sa riding in tandem diha sa Sitio Kagudoy, Barangay Basak sa Dakbayan sa Lapu- Lapu alas 9 pasado ang takna sa miaging  Biyernes sa gabii.

Si Police Master Sergeant Romualdo Anana sa Presinto 4 miila sa biktima nga mao si Saidato Masarong Saumay, 25, taga Sitio Iba, Barangay Basak sa maong dakbayan.

Nagmaneho sa iyang motorsiklo ang biktima dihang usa ka wala hiilhing mga lalaki ang mipusil sa biktima nga nakaingon sa kamatayon niini.

Padayon pa ang gihimong imbestigasyon sa kapolisan kun unsay motibo sa pagpatay sa biktima ug pag-ila sa mga mamumuno .

Niadtong Pebrero 23, 2021 ang pangulo sa Muslim Affairs Office sa maong dakbayan nga si Abdulah Pabilla gipusil patay usab sa riding in tandem sa  Lapu -Lapu City Hall compound.

Ang kapolisan wala pa usab makahatag og dugang impormasyon bahin sa kamatayon sa maong opisyal samtang wala sab masuta kun konektado ba ang kamatayon sa duha.

Sa pikas bahin, nailhan na ang patay nga lawas nga nagutaw-utaw sa kadagatan sa Argao hapon sa adlaw nga Biyernes.

Ang patay nga lawas iya ni Arnulfo Languido, 51, taga barangay Labogon Mandaue City ug usa ka seaman.

Matud pa ni Police Staff Sergeant Howard Mynopas, Desk Officer sa Argao Police Station ang patay’ng lawas nabangalan sa kadagatan sa Barangay Guiwanon sa maong lungsod.

Sumala pa ni Mynopas, walay nakaila sa ilang lungsod sa maong tawo, hinungdan ilaha kining gisibya ug personal usab kini nga giila sa pamilya ang namatay.

Gitug-an ni Mynopas  niadtong Marso 2, 2021 pa nawala si Languido kinsa crew sa usa ka barko nga nidunggo sa lungsod sa Minglanilla base sa pamahayag sa kapitan sa barko niini. Matud pa nga sa dihang nawala si Languido gipahibalo nila kini sa Philippine Coastguard.

Ang lawas gikatakdang ipaubos sa autopsy aron matino kun unsay gikamatyan niini. –Rowena D. Capistrano/IBM (BANATNEWS)