Biyahedor nga mosulod sa Cebu City dili na i-quarantine

Cebu, Philippines — Gipahibalo ni Mayor Edgardo  Labella kagahapon  nga dili na mopaubos og 14 ka adlaw nga quarantine ang mga  biyahedor nga mosulod sa Cebu City  basta negatibo lang  ang resulta sa RT-PCR test niini.

Gitangtang na usab sa listahan sa requirements ang pagdala og travel authority ug wala na kinahanglana ang medical certificate nga gikan sa laing local government units.

Ang Authorized Persons Outside of Residence (APORs) exempted kini sa RT-PCR requirement kon mosulod kini sa Dakbayan sa Sugbo.

Samtang sa Dakbayan sa Mandaue, daghan ang nagpakisayod diha sa buhatan sa turismo sa siyudad kalabot sa gipatuman nga protocol.

Kini subay sa paglibkas na sa pipila ka rekisitos nga gipatuman sa Inter-Agency Task Force nga naglakip sa travel authority, medical certificate ug uban pa alang sa mga mobiyahe ngadto sa nagkalainlaing lugar sa nasud

Si Hazel Tamondong, city tourism officer sa siyudad nibutyag nga gatusan ka letter of confirmation ang naluwatan sa ilang buhatan alang niadtong nagtinguha sa pagbisita sa siyudad.

Ang mga updated protocol alang sa locally stranded individuals naglakip sa valid ID, certificate of barangay residency, complete address sa dakbayan ug contact number niini.

Sa laing bahin, ang Probinsiya sa Sugbo molusad og tour package alang sa pre-holy week ug holy week sa mga turista gikan sa ubang bahin sa nasud hilabina didto sa Luzon. Base sa report sa Sugbo News ang maong packages mo-pattern sa Suroy-Suroy Sugbo concept nga ilusad karong bulana uban sa pribadong tour operators, airlines, transport operators ug mga hotel ug resorts sa probinsiya.

Si Gobernador Gwendolyn Garcia nakigtagbo sa direktor sa Department of Tourism  (DOT)-7 Shalimar Tamano, Maria Lester Ybañez, provincial tourism officer ug ubang tourism stakeholders kalabot sa plano nga holiday getaway.

Si Garcia niluwat kini sa Executive Order No. 12 alang sa guidelines sa mga turista na mobisita sa probinsiya kinahnglan ra nga mopresentar og medical certificate pito ka adlaw sa dili pa ang ilang travel date ug pre-booking reservation sa hotel o resort nga ilang puy-an samtang nagbakasyon.

Wala na mo-require pa og RT-PCR test ang Kaptilyo alang sa mga turista. - Romeo T. Limpangog . Le Phyllis F.  Antojado (BANAT NEWS)