Bangko mopahuwam og P20 bilyon sa mag-uuma ug ubang sector

Cebu, Philippines — Nikabat ngadto sa P20 bilyones ang ipahulam sa tulo ka banking institutions alang sa mga mag-uuma, mananagat ug ubang sektor kinsa gustong mo-invest sa production ug sustainability sa food supplies

Ang Probinsiya sa Sugbo nilusad kini kagahapon sa Enhanced Countryside Development (ECD) program diin tumong niini ang self-sufficient sa food supply ug uban pa.

Subay niini, nagpinirmahanay og Memorandum of Agreement ang opisyales sa Kapitolyo gipangulohan ni Gobernador Gwendolyn Garcia ug mga representante sa Land Bank of the Philippines, Development Bank of the Philippines, ug Philippine Veteran’s Bank alang sa ECD program.

Matud ni Roldan Saragena, hepe sa Provincial Agriculture Office nga ang mga interesado nga moapil sa ECD program adto mo-apply sa ilang Local Agriculture’s Office ug dayon isumiter ang ilang application sa Provincial Agriculture Office alang sa screening sa ilang application ug requirement ug isumiter kini ngadto sa banking institutions nga maoy mopahulam sa pundo alang sa ilang negosyso.

Si Saragena nagkanayon nga ilang gipanghingosgan ang pagtanom sa mais ug balanghoy tungod kay dako ang demand niini. Samtang si Garcia nagkanayon nga dako kining tabang ang ipahulam nga pundo sa mga bangko aron masugdan ang pagtanom ug invest sa mga Sugboanon. (BANAT NEWS)