Payroll sa hinabang sa senior citizens giandam na
Cebu, Philippines — Gipahibawo ni Cebu City Mayor Edgardo Labella nga giandam na sa Office of the Senior Citizens Affair ang payroll alang sa hinabang pinansiyal sa mga senior citizen sa siyudad.
Matud ni Labella nga nalangan ang paghatag sa financial assistance sa senior citizens gumikan kay ang Treasurer’s Office ug ang Accounting Office na-busy tungod kay panahon karon sa pagbayad sa business taxes ug gilugwayan kini sa kagamhanan sa siyudad hangtud sa Marso 20 niining tuiga.
Si Labella nipasalig nga sa dili pa mahuman ang buwan sa Marso mahatag na ang financial assistance sa mga senior citizen alang sa buwan sa Enero, Pebrero ug Marso.
Sayo pa, ang kagamhanan sa siyudad nakig-alayon kaniadto sa Land Bank of the Philippines alang sa cash card nga ipanghatag sa senior citizens aron adto nalang ihulog ang ilang financial assistance ug dili na sila kinahanglang mogawas paglikay sa COVID-19.
Nasayran usab nga nahuman na sa LBP ang 15,000 ka cash cards ug sutaon sa siyudad kong daghan na ba ang nakadawat niini aron kadtong nahatagan na og cash cards pwede na nila kining gamiton.
Gibana-bana nga moabot ngadto sa 80 mil ka senior citizens ang anaa sa Cebu City. (BANAT NEWS)
- Latest
