Mga imnanan namalhin sa bukirang lugar sa Cebu City

CEBU, Philippines — Mga imnanan sa Dakbayan sa Sugbo giingong namalhin ngadto sa mga bukirang lugar sa siyudad.

Kini ang gibutyag ni Police Lieutenant Colonel Wilbert Parilla, deputy director sa Cebu City Police Office (CCPO).

Sayo pa, si Cebu City Mayor Edgardo Labella niluwat sa Executive Order No. 117 nga nagpatuman og liquor ban diin usa kini sa mga lakang sa kagamhanan sa Dakbayan sa Sugbo aron mamenosan ang kaso sa COVID-19 sa siyudad.

Gumikan sa report nga nadawat sa CCPO si Parilla niawhag sa establisamento sa bukirang barangay sa siyudad nga motuman sa nahisgutang EO tungod kay wala pa kini malibkas.

Si Parilla natahap nga usa kini sa mga hinungdan nga daghang insidente sa disgrasya diha sa Transcentral Highway tungod kay ang drayber nakainom kini samtang nagbiyahe. —BDB (BANATNEWS)

LTO-7 adunay dugang slots sa TDC

Decemay P. Padilla

CEBU, Philippines — Gipahibawo sa direktor sa Land Transportation Office (LTO)-7 Victor Emmanuel Caindec nga adunay dugang slots alang sa Theoretical Driving Course sa Driver’s Education Center sa rehiyon.

Nakig-alayon usab ang LTO-7 aron makakuha og regular funding alang sa DEC, aron usab dili lang Theoretical Driving Course ang itanyag apil na ang Practical Driving Course.

Kini human ang LTO central office nipaibawo nga ang 15-hour TDC alang sa LTO DEC libre na kini. Ubos sa LTO Memorandum Circular 2019-2176, kinahanglang mapaubos sa mandatory 15-hour TDC ang usa ka indibidwal aron makakuha sa ilang student-driver permit.

Matud ni Caindec nga gikan sa lima ka estudyante kada semana nidugang sila og 20 ka slots matag semana o 25 ka estudyante na ang makakuha sa TDC course.

Gipasabot ni Caindec nga ang instructors mga existing personnel kini sa ahensiya diin kinahanglang mohimo sa courses katulo sa usa ka semana ug lima ka oras kada adlaw gawas sa ilang kasamtangan nga trabaho.

Ang TDC sa DEC sa LTO-7 adunay duha ka lawak-saringan, ang usa alang sa special sectors sama sa persons-with-disability, senior citizens, lactating women, pregnant women samtang ang laing usa alang sa publiko.

Niadtong Agosto 2020, ang LTO-7 nagsugod og tanyag sa TDC courses pinaagi sa DEC apan gumikan sa pagpatuman sa minimum health protocols sama sa physical distancing limitado ra ang mga tinun-an nga maakumodar kada semana. —BDB (BANATNEWS)