Cebu City nisusi na sa vaccination sites
CEBU, Philippines — Si Konsehal Dave Tumulak, usa sa mga gitahasan sa pagpangita og vaccination sites sa Siyudad sa Sugbo nagkanayon nga aduna na sila’y gipangsuroy nga mga lugar nga haom nga pahigayonan sa vaccination batok sa COVID-19.
Matud ni Tumulak nga aduna na sila’y mga napili nga ga lugar usa niini ang Lourdes Parish-Don Bosco Youth Center diha sa Barangay Punta Princesa ug adunay malls.
Si Tumulak nagkanayon nga sa pagpili og lugar alang sa vaccination usa sa gikonsiderar ang gilapdon sa lugar tungod kay daghang section nga ipamutang sama sa registration, verification, screening, vaccination ug monitoring.
Gibutyag ni Tumulak nga adunay mga tunghaan ang gusto nga adto sa ilang lugar ipahigayon ang vaccination ug tan-awon kini sa siyudad.
Nasayran nga adunay pagahimuon nga pre-registration ang kagamhanan sa siyudad aron ang mga tawo makahibawo sa ilang schedule kanos-a sila mabakunahan ug unsang orasa aron hapsay ug malinawon ang pagpahigayon unya sa vaccination sa siyudad.
Sa laing bahin, gipangulohan ni Mayor Junard Ahong Chan sa Dakbayan sa Lapu-Lapu ang simulation exercise alang sa COVID-19 vaccination program nga pagahimuon sa kagamhanan diin kabahin kini sa gihimo nilang pagpangandam alang sa actual nga vaccination ug ubos kini sa supervision sa Department of Health.
Subay niini, gipanghimakak sa opisyales sa siyudad ug kadagkoan sa DOH-7 nga si Chan ang nakadawat na og actual shot sa Sinovac vaccine atol sa maong kalihokan. Si Dr. Mary Jean Loreche, tigpamaba sa DOH-7 nagkanayon nga placebo lang gi-inject sa health officials ngadto kang Chan.
Giingong ang placebo usa kini ka substance nga gigamit sa COVID-19 vaccine trials. —Romeo T. Limpangog/BDB (BANATNEWS)
- Latest