Labella: Kooperasyon sa PNP ug PDEA imentinar

CEBU, Philippines — Giawhag ni Mayor Edgardo Labella ang Cebu City Police Office (CCPO) ug Philippine Drug Enforcement Agency (PDEA)-7 nga imentinar ang inter-agency cooperation sa anti-drug operations sa dakbayan.

Tumong sa maong kamandoan nga ang nahitabong misencounter sa duha ka government units didto sa kaulohan ang dili mahitabo dinhi sa Sugbo.

Matud ni Labella nga importante kaayo ang koordinasyon aron malikayan ang kagubot ug walay mangaangol sa habig sa gobiyerno sa mahitabong operasyon.

Gidayeg ni Labella ang CCPO ug PDEA sa hugtanong kampaniya niini batok sa ginadiling drugas.

“I trust that our CCPO and PDEA-7 have maintained proper coordination aron pagseguro sa luwas ug malinawon nga mga operasyon batok sa ilegal nga drugas dinhi sa atong siyudad”, padayag ni Labella. Gipadalhan ni Labella og suwat ang direktor sa CCPO Police Colonel Josefino Ligan ug direktor sa PDEA-7 Levi Ortiz alang sa maong katuyoan.

Mangayo usab og report ang buhatan sa mayor sa tanang drug operations sa maong mga ahensiya. BDB (BANATNEWS)