Bombero, mga pari gi-swab test

CEBU, Philippines — Dili momenus 30 ka  bombero sa  Dakbayan sa Sugbo ang gipaubos sa swab test kagahapon human sila giingong na-exposed sa nagpositibo sa coronavirus  matud pa ni Senior Fire Officer 2 Wendel Villanueva, tigpamaba sa Cebu City Fire Office. Matud niya niadtong Sabado duna sila’y panagtigom nga gihimo aron unta pangandaman ang pagbukas sa Fire Prevention Month kagahapon.

Sa ilang meeting gipatawag ang mga personnel sa tanang sub-station, apan Pebrero 28 sa kaadlawon diha pa matod pa nigawas resulta sa 13 nila ka mga sakop nga napositibo sa virus.

Tungod kay nakauban man nila ang uban sa mga napositibo atol sa maong tigom nakadesisyon sila nga kanselahon ang ilang mga giandam nga kalhihokan alang sa pagbukas sa Fire Prevention Month adtong Marso 1.

Upat ka fire-substations sa siyudad ang gi-lockdown ug kini mao ang Parian, Pahina, Pardo ug Lahug.

Gipasalig ni City Fire Director Chief Inspector Josephus Alburo nga kontrolado ang tanan ug wala’y angay ikabalaka ang publiko tungod kay giatiman na ang mga napositibo ug magpadayon ang uban pa nilang serbisyo.

Sa kalambigit nga balita, gisirhan sab ang Our Lady of Sacred Heart Capitol Parish human adunay kompirmadong kaso sa staff sa maong simbahan matud pang  Rev. Fr. Ruben Endona, Member Team of Pastors sa Our Lady of Sacred Heart Parish.

Base sa advisory, ilang gipahibalo ang publiko nga adunay confirmed Covid-19 case ug nagpahigayon sila og swab test sa tanan nilang mga pari ug personnelmao nga nagpahigayon sab sila og mandatory quarantine samtang nagpaabot sa ilang testing results.

Ang kadagkuan sa simbahan, niawhag sa mga magtutuo nga moapil sa live masses nga ipakita sa ilang parish Facebook page.

Si retired major general Mel Feliciano, Deputy Chief Implementer for Inter-Agency Task Force for the Management of Emerging Infectious Disease(IADT-MEID) mihangop sa agresibong contact tracing nga gihimo sa Emergency Operations Center Cebu City kay makapamenus kini sa gidaghanon sa mga kaso.

“Hopefully, ma-maintain, mapanaog nila, kung mapanaog niya modire-diretso na, makuha na nato nga level. Dali na siya i-maintain so for the EOC kinahanglan continue to be aggressive mao na atong EOC sa Cebu City karon,” sigon pa ni Feliciano.

Nakita sab niya nga wala pa sa peligro ang mga tambalanan sa siyudad  tungod duna pay sobra 300 available beds alang COVID ug ICU beds.

“Safe pa ta, wala tay problema sa mga isolation facilities we have enough, mga Barangay Isolation Centers, we have also hotels karon, walo na ka hotels atong gi-accredit sa DOH para magamit for those who prefer to be isolated in the hotels so wala tay problema sa mga facilities nato,” ni Feliciano pa. —Decemay P. Padilla, Rowena Capistrano/IBM (BANATNEWS)