TF/Banat News chairman ilubong karon
CEBU, Philippines — Ilubong karong adlawa si The Freeman/Banat News chairman Jose “Dodong” Gullas sa sud sa compound sa Daughters of Sta. Teresa sa Valladolid, Carcar City.
Si Mother Louella Grace Buscato, superior general sa DST sisters mibutyag sa The Freeman kagahapong adlawa nga si Cebu Auxilliary Bishop Midyphil Bermejo Billones mao ang mangulo sa requiem mass ni Gullas ala-una sa hapon karong adlawa.
Kahinumdoman nga si Gullas gihaya sa Crystal Palace sa Cosmopolitan Funeral Homes sa Nivel Hills Brgy. Lahug, Cebu City gikan Pebrero 25 hangtud kagahapong adlawa Marso 2 dayon gidala ang iyang lawas sa Carcar.
Ang lawas ni Gullas gimotorkada ug milabay sa University of the Visayas sa dalan Colon, The Freeman Newspaper-Banat News ug JRG Halad Museum sa V. Gullas Street corner D. Jakosalem Street, Cebu City diin kini gipaabot sa mga empleyado nga nagdala og mga buwak.
Gihayag si Gullas kagabii sa Domus Teofilo chapel, ang kapilyang gitabangan ni Gullas pagtukod pila ka tuig na ang milabay inay sa multi-milyones nga kapilya sa Sta. Teresa chapel nga gitabangan sab ni Gullas sa pagpabarog.
“Diri ra ang iyang wake gibutang sa Domus Teofilo kay abog kaayo ang new chapel tungod sa paghimo sa nitso ni Sir Dodong,” pasabot pa ni Buscato.
Si Gullas anha ilubong sa tupad sa maong kapilya agi og pagpasalamat sa mga madre sa pagtabang niini sa ilang kongregasyon. Si Gullas pa lamang ang dili pari o madre nga ilubong sa maong compound.
Ikauban niya sa compound ang mga mitaliwan nga mga madre ug si anhing Cebu Archbishop Teofilo Camomot, kinsa namatay sa aksidente nidatong 1988 ug gihikay karon ang pagbayaw kaniya isip usa ka santos. Si Camomot maoy nagtukod sa DST 60 ka tuig na ang milabay.— IBM (BANATNEWS)
- Latest
