CCTO miklaro nga wa silay gisugo nga mag-solicit

CEBU, Philippines — Giawhag sa Cebu City Transportation Office (CCTO) ang taxi ug bus operators ug ubang pribadong kompaniya nga susihon una kun ugaling dunay magsolicit nga magdala sa pangan sa CCTO.

Si CCTO Deputy Chief of Operations nga si Paul Gotiong nitambag sa katawhan nga dili dayon magpadala sa ingon niini nga modus tungod kay dili nila batasan ang mag-solicit sa mga kompaniya.

Una nini sa miaging semana dunay nadakpan nga nigamit sa CCTO sa pagpangayo og kuwarta.

Niadtong miaging buwan, dunay nadakpan ang kapolisan nga ginganlan og Emanuel Abadies Ravina alyas Lito Abella Bacalso, 58 anyos nga taga Paradise 2, Brgy. Kinasang-an, Pardo.

Suma pa ni Gotiong nga ang maong  dinakpan nangilad ug nagpaila isip usa ka sakop sa  CCTO aron  maka pangilkil-kil og  kwarta sa nagkalain-laing kompanya sa taxi ug bus.

Ang modus sa maong lalaki mao ang pagpaila nga dako siya nga opisyal sa CCTO, ug kini iyang gamiton aron pagpanghadlok sa higayon nga dili niya makuha ang iyang pangayuon nga kantidad.

Nagkanayon si Gotiong nga dunay taxi company nga nitawag sa ilang buhatan aron itahu ang maong binuang, busa dali sila nga nitawag sa kapolisan ug na-entrap ang suspek.

Giawhag sa CCTO ang tanang nabiktima sa maong suspek nga mosang-at gyud og kaso. MEL (BANATNEWS)