COSAP: drug test results, i-apil sa rekisitos sa hiring sa Brgy

CEBU, Philippines — Gidasig sa City Office for Substance Abuse Prevention (COSAP) ang mga barangay officials nga ilakip sa requirement sa pag-hire og trabahante sa barangay ang drug test result. 

Kini aron masiguro nga walay tiggamitan og drugas sa ilang mga trabahante ug makahatag kini og tukmang serbisyo sa katawhan pinaagi sa pagmintinar sa kahapsay sa barangay.

Sa pakighinabi sa Banat News ngadto sa pangulo sa COSAP nga si Jonah John Rodriguez nagkanayon kini nga importante kaayo ang kooperasyon sa mga opisyales ug dili magpataka og dawat og mga trabahante.

Subling gitataw ni Rodriguez nga pulos ra gyud kadautan ang mahatag sa pagamit og ginadiling drugas busa angayan nga likayan ang maong bisyo.

Kinahanglan matud pa nga magsilbing maayo nga ehemplo ang mga trabahante sa barangay sa kampanya nila batok sa ginadiling drugas.

Suma pa niya nga kun drug user gani ang usa ka trabahante sa barangay, dili kini makahatag og konsentrasyon sa iyang trabaho ug tataw nga mausik ang kuwarta sa katawhan nga maoy gigamit alang sa ilang honorarium.

Sa miaging tuig (2020), moabot ngadto sa 39 ka barangay workers ang nagpositibo sa pagamit og drugas.

Isip pag-abag sa mga indibidwal nga gustong mag-usab, nagpadayon gihapon karon ang rehabilitation program sa COSAP og libre ra gyud ang programa.

Gidugang ni Rodriguez nga dili pa ulahi ang tanan ug duna pa gyuy panahon nga mag-usab sa ilang kaugalingon ang mga drug users. MEL (BANATNEWS)