“Gulayan sa Barangay” gilusad sa Dakbayan sa Toledo

CEBU, Philippines — Gilusad sa Kagamhanan sa Toledo City ang ilang “Gulayan sa Barangay” diin tumong niini aron dunay kakuhaan og pagkaon ilabi na karong panahon sa pandemya.

Gihimo usab nila kini og kompetisyon sa 38 ka barangay sa Siyudad diin ipakita sa mga partisipante ang maayo nila nga pag-atiman sa gitanom nila nga lagutmon base usab sa gilatid nila nga mga criteria.  

Suma pa sa media liaison sa Toledo nga si  John Roseller Layan nga gihangop pag-ayo sa tanang barangay ang maong programa  gumikan kay nadasig kini sa paghatag og importansysa sa pagtanom ug duna gyud silay pagkaon bisan pa man sa pandemya nga ilang gisagobang.

Ang mananaug sa maong kompetisyon makadawat og premyo ingon man consolation prizes alang sa mga partisipante.

Hinuon kasagaran sa nangapil wala maghuna-huma og kompetisyon, ang ilaha nga makasalmot sa programa nga makatabang kanila sa pagdasig sa pag-atiman sa ilang mga gipangtanom.

Dugang pa ni Layan nga nahuna-hunaan kini sa tanang opisyales sa Toledo nga gipangulohan ni Mayor Marjorie Piczon-Perales kun diin inspired kini sa Sugbusog Program ni Gobernador Gwendolyn Garcia.

“Nindot kaayo ang response sa atong mga kaigsuonan. Maseguro nato nga dili gyud sila mawad-an og pagkaon sanglit naa ra gyud kini sa ilang mga tugkaran,” suma pa ni Layan. MEL (BANATNEWS)