Tanang 80 barangay sa Cebu City nakatala na og COVID-19

CEBU, Philippines — Wala nay barangay sa Cebu City nga wala maigo sa Covid 19 human ang Barangay Tabunan adunay nay natalang kaso matud pa sa Emergency Operations Center.

Ang Banat News nakakuha og kopya sa line list nga gipadala sa mga barangay kaniadtong Pebrero 27 ug nakita nga ang Tabunan nga wala pa kaniadtoy kaso, aduna karoy usa ka kaso sukad pagsugod sa pandemiya sa miaging tuig.

Apan bisan pa niini, si Deputy Chief Implementer sa EOC ug konsehal sa syudad nga si Joel Garganera malipayong mipahibalo nga 14 sa 80 ka barangay sa dakbayan man sab ang walay gikatahong Covid 19 transmission sud sa nakalabay nga napulo ka adlaw. Nadoble kini itandi sa miaging semana butang nga nakapahimuot sa EOC.

Gawas pa niini mas daghan na ang nakarekober kaysa sa mga bag-ong kaso nga natala sud sa unom ka adlaw nga nilabay bisan kung sa datos sa Department of Health-VII nagpakita nga adunay duha ka adlaw nga mas daghan ang mga bag-ong kaso kaysa nangaayo na. Ang mga kaso sa Dakbayan sa Cebu nga mikunhod na pud sa 2,992 kaniadtong Pebrero 27 sa dihang adunay 174 nga mga pasyente ang mga naayo na. Kadaghanan sa mga kaso karon mga giingong close contacts sa mga index cases.

Samtang, sa bulletin sa kaso sa DOH-VII, ang Dakbayan sa Lapulapu karon adunay 856 nga aktibo nga kaso lakip ang 30 nga bag-ong kaso samtang ang Mandaue adunay 804 lakip ang 32 nga bag-ong kaso.

Sa laing bahin, ang Lalawigan sa Cebu adunay dugang nga 86 nga mga kaso nga naghimo sa 1,417 nga kinatibuk-ang kaso nila ug aduna puy duha ka mga namatay base sa alang usab sa datos sa DOH-VII.

Ang Bohol, adunay 130 ka aktibo nga kaso, Negros Oriental nga adunay 391 ug Siquijor adunay 12. IBM (BANATNEWS)