Chan makighiusa sa probinsiya sa ipatuman nga polisiya

Cebu, Philippines — Gitinguha ni Mayor Junard Ahong Chan nga makighiusa ang Siyudad sa Lapu-Lapu sa kagamhanan sa Lalawigan sa Sugbo sa ipatuman nga mga polisiya ngadto sa mga turista ug biyahedor kinsa nagtinguha sa pagbisita sa Sugbo.

Sa  giluwatan nga executive order ni Gobernador  Gwendolyn Garcia nagmando kini alang sa pagwagtang sa rekisitos sa mobisita sa Sugbo ang negatibo nga resulta sa RT-PCR test  alang sa mga turista ug travelers  sa probinsiya.

Matud ni Chan nga iyang gipaboran ang maong lakang ni Garcia ilabi na nga ang Dakbayan sa Lapu-Lapu ug ang Lalawigan sa Sugbo makonsiderar na lang ang mga turista nga maoy nagsilbi nga “bread and butter” sa ekonomiya

Si Chan nagkanayon nga gitinguha usab niya ang pagluwat og executive order sa pagpahaom usab sa mga polisiya nga gipatuman sa kagamhanan sa lalawigan alang sa mga turtista ug mga dumduong sa dakbayan.

Apan kini ubos sa kondisyon nga sa dili pa mopatuman sa maong lakang ibalik usab ang help desk sa Mactan Cebu International Airport (MCIA) nga gitangtang.

Tumong niini alang sa pagsiguro nga ang mga turista ug mga biyahedor sa Sugbo  ang matinud-anon usab nga nagtuman sa mga minimum health protocol. (BANAT NEWS)