Polis sa Minglanilla dili mag-uniporme inig ka gabii

CEBU, Philippines — Makita na unya ang kapolisan sa Lungsod sa Minglanilla panahon sa kagabhion nga dili na mag-uniporme.

Tumong niini nga ang mga badlongon sa  katilingban kinsa mosiaw sa pagbuhat og krimen panahon sa gabii ang ilang masikop.

Si Police Major William Homoc, hepe sa kapolisan sa Lungsod sa Minglanilla nagplano sa pag-umol og grupo nga mao ang “project nighthawk”.

Matud ni Homoc nga mosuroy ang grupo nga naka-civilian diha sa kadalanan sa lungsod nga magsakay og motorsiklo.

Gipasabot ni Homoc nga kasagaran sa mga kriminal ang mga polis lang ang bantayan dayon mohimo kini og krimen.

Ang mga polis dali kining mabantayan o mailhan sa mga kriminal tungod kay magsul-ob man kini og uniporme.

Nagtuo si Homoc nga sa maong pamaagi ang mga badlongon dili na kini makabantay nga adunay polis diha sa palibot ug masikop usab dayon kini.

Nasayran nga sa niaging semana usa ka nurse ang gitulis sa duha ka nagmotorsiklo hinuon nasikop ang mga suspetsado.

Dugang ni Homoc nga ang mga polis nga dili magsul-ob sa ilang uniporme nga magsuroy-suroy diha sa lugar kinahanglang magdala sa ilang tsapa ug ID aron pagmatuod nga sila sakop sa operatiba. BDB (BANATNEWS)