Zafra: Tigbakay ipahigayon diha sa suok-suok sa kabarangayan
CEBU, Philippines — Ang kagamhanan sa Dakbayan sa Sugbo nakadawat og report kabahin sa giingong mga tigbakay diha sa kabarangayan sa siyudad.
Si Konsehal Phillip Zafra, chairman sa committee on peace and order sa konseho sa siyudad nipadangat og warning ngadto sa mga indibidwal nga nalambigit sa tigbakay nga hunongon na kini aron dili sila matingkagol sa prisohan.
Matud ni Zafra nga gawas nga ilegal nagmugna usab kini og tapok-tapok nga kuyaw nga mahimong hinungdan sa transmisyon sa COVID-19.
Gibutyag ni Zafra nga mopadala na siya og komunikasyon ngadto sa kapolisan ug sa Task Force Kasaligan aron masikop ang mga nagpasiugda og tigbakay. “Mohangyo ta sa katawhan nga undangon na nato ang mga tapok-tapok ilabi na kanang tigbakay. Nagkinahanglan intawn ta sa inyong kooperasyon aron dili mosamot og saka ang kaso sa COVID”, matud ni Zafra.
Una na nga nanawagan si Zafra ngadto sa opisyales sa barangay nga hingusgan usab ang pag-roving sa ilang mga hurisdiksiyon ilabi na ang mga suok-suok tungod kay diha nagbaha ang mga tapok-tapok sa mga tawo ug wala na mosunod sa physical distancing.
Naobserbahan usab ni Zafra nga adunay mga tawo nga sige lang og tabi kauban ang ilang mga silingan ug wala kini mopatuman og social distancing ug adunay wala na magsul-ob og facemask.
Ug adunay ubang tawo nga ang otoridad ray bantayan ug mamalik dayon kini sa tapok kon wala na ang mga nagbantay. BDB (BANATNEWS)
- Latest
