P8.7 milyones marijuana nalarot sa Asturias

CEBU, Philippines — Nikabat ngadto sa P8.7 milyones ang kantidad sa marijuana ang nalarot sa atol sa gipahigayong operasyon sa kapolisan kagahapon sa buntag diha sa Barangay Kaluangan, Lungsod sa Asturias.

Ang Cebu Provincial Police Office, Provincial Intelligence Unit, Provincial Mobile Force Company, Philippine Drug Enforcement Agency (PDEA)-7 ang nagpahigayon sa maong pagpangronda diha sa marijuana plantation sa lugar.

Si Police Lieutenant Lino Galvan III, deputy chief sa PIU nagkanayon nga ang giingong nagtanom sa mga marijuana mao si Jay-r Camaongay ug Johnny “Yungko” Escarpe kinsa daling niikyas human nakabantay nga nagpadulong na ang mga polis diha sa lugar.

Nikabat ngadto sa 11, 250 ka punoan nga marijuana ang nalarot sa kapolisan gikan sa 800 square meters nga luna diin gibanabanang nikantidad tanan ngadto sa P4.5 milyones.

Laing 10,500 ka punoan nga marijuana nga gitanom diha sa 650 square meters nga luna sa Sitio Uling sa nahisgutang barangay ang nalarot usab diin gibanabanang nikantidad tanan ngadto sa P4.2 milyones.

Matud ni Galvan nga ang amahan ni Camaongay  nga si Baresto ang gikatahong dugay na nga mananomay og mga marijuana.

Sa laing bahin, duha ka suspetsadong drug pusher ang nasikop atol sa buy bust operation sa kapolisan kagahapon sa kadlawon diha sa managlahing lugar sa Dakbayan sa Sugbo.

Si Police Lieutenant Colonel Wilbert Parilla, deputy director for operations sa Cebu City Police Office nagkanayon nga nasikop nila si Dennis Earl Pascom hingkod ang panuigon diha sa Barangay Lorega ug nasakmitan nila kini og 32 gramos nga shabu nga nibalor tanan ngadto sa P270 mil.

Samtang si Regie Maniego, hingkod usab ang panuigon nasikop sa kapolisan sa Labangon Police Station diha sa Salvador Extension, Barangay Labangon ug nakuhaan kini ug 25 gramos nga shabu nga nibalor tanan ngadto sa P170 mil.

Sa Lungsod sa Liloan nasikop si Nolasco Sasing Juntong, 36 ug Rachel Habel Sevilla, 29, parehong residente sa Barangay Poblacion, Lungsod sa Liloan kagahapon sa  kadlawon.

Si Police Major Danilo Colipano, hepe sa Liloan Police Station nagkanayon si Juntong nakamatikod sa mga polis ug nisulay kini sa pagdagan dungan ang pagpaboto sa iyang armas hinungdan nga ang mga polis nibawos og pusil ngadto sa suspetsado ug naangol kini.

Nasakmit sa kapolisan gikan sa suspetsado ang .9mm nga pistola nga adunay serial number nga 1674524, magazine nga adunay bala ug kalibre .38 nga revolver nga adunay bala, 0.90 gramo nga shabu nga nagkantidad og P6,000.— Romeo  T. Limpangog/BDB (BANATNEWS)