Walo angol human gi-shot gun sa senior citizen

CEBU, Philippines — Walo ka tawo ang nangaangol human ang usa ka tiguwang nga lalaki kinsa nakainom ang giingong nagmaoy ug namusil gamit ang iyang sumpak nga armas atol sa gipahigayong birthday party niadtong Martes sa gabii diha sa Sitio Kolansihan, Barangay Lepanto, Lungsod sa Alegria.

Ang mga naangol mao sila si Nilo Lerio,39-anyos; Camilo Devila Jr., 35; Michael Denuyo, 23; Toni Legarde, 20; Arthur Durango, 23; Carlo Baisac,49; Lestor Devila, 24 ug usa ka menor de edad.

Ang suspetsado mao si Pablo Iran, 60, biyudo, mag-uuma ug residente sa maong lugar.

Base sa imbestigasyon sa kapolisan nga nitambong og birthday party sa ilang silingan si Iran ug giingong gibinuangan kini hinungdan nga niuli sa ilang balay ug nibalik kini nga nagbitbit na og sumpak dayon  pamusil ngadto sa mga tawo.

Matud ni Police Lieutenant Jesus Cuntapay Jr., hepe sa Alegria Police Station nga tungod sa kalagot sa mga tawo diha sa lugar gikulata si Iran hinungdan nga nakaangkon kini og mga bun-og sa lawas.

Ang mga biktima lakip na si Iran ang daling gidala ngadto sa tambalanan.

Nasakmit sa kapolisan gikan kang Iran ang 12 gauge improvised shotgun (sumpak). —BDB (BANATNEWS)