Patay’ng lawas sa tiguwang babaye napalgan sa kasagbutan

CEBU, Philippines — Patay na nga napalgan ang usa ka tiguwang nga babayeng niadtong Martes sa gabii diha sa bakanteng luna sa Sitio Huybesan, Barangay Alpaco, Dakbayan sa Naga.

Ang namatay giila nga si Prina Causapin, dalaga ug resdente sa maong lugar.

Base sa imbestigasyon sa kapolisan nga alas 7:00 sa buntag sa maong adlaw nilakaw si Causapin aron manguha og lawog sa iyang kahayopan ug nahibulong ang iyang mga pamilya tungod kay wala na kini mouli pagka-udto.

Ang pamilya ni Causapin gibati og kabalaka tungod kay niabot na sa alas 6:00 sa gabii wala pa gihapon siya mauli hinungdan gipangita na siya diha sa maong lugar.

Nakita sa pamilya ni Causapin ang iyang patay’ng lawas diha sa kasagbutan 100 metros ang gilay-on gikan sa ilang balay.

Ang kapolisan sa siyudad pinangulohan ni Police Lieutenant Colonel Florendo Fajardo nipahigayon kini og follow up nga imbestigasyon sa hitabo.

Hinuon walay nakitang mga samad ug mga ban-og sa lawas ni Causapin diin ang iyang pamilya nagtuo na-heat stroke kini.

Ang kapolisan nirekomendar sa pamilya ni Causapin nga ipa-autopsy ang patayng lawas aron masuta ang hinundan sa kamatayon niini. —BDB (BANATNEWS)