Asymptomatic dili na dalhon sa tambalanan; 231 dugang recoveries sa Cebu City

CEBU, Philippines — Si Cebu City Councilor Joel Garganera, deputy chief implementer sa Inter-Agency Task Force Emergency Operations Center Cebu City nagkanayon nga ang occupancy rate sa health care facility niabot na ngadto sa 50 porsyento sa pribado ug pampubliko nga hospital.

Matud ni Garganera nga 30 ngadto sa 40 porsyento nga na-admit sa mga tambalanan mga asymptomatic diin buot nilang mahatagan kini og pagtagad tungod kay dili sila buot nga ang mga tambalanan ma-overwhelmed.

Usa sa mga lakang nga gihimo mao ang pag-abli og mga hotel diin adto mahimong mag-isolate ang pasyente nga walay sintomas o mild ra ang COVID-19 symptoms.

Ang EOC lakip ang Department of Health ug Department of Tourism nitrabaho na niini.

Aron malikayan nga mapuno ang mga tambalanan sa Siyudad sa Sugbo si Garganera nagkanayon nga sila sa EOC dili na mo-pick up ug mohatod sa ospital niadtong mga nagpositibo sa COVID-19 nga walay gipamati.

Matud usab ni Garganera nga dili sila gusto nga mabalik ang nahitabo kaniadto nga napuno ang mga tambalanan taas ang queue lane ug kadtong mga nagkinahanglan gyud og medical attention nga naglisod ug kritikal ang kahimtang wala na hinuon kasulod sa ospital.

Sa laing bahin, base sa datos nga gipagawas sa Department of Health (DOH)-7 niadtong Pebrero 23, 2021 ang Cebu City nakatala og 231nga dugang recoveries sa COVID-19.

Ang kinatibuk-ang recoveries sa Cebu City karon nikabat na ngadto sa 12,795 ug 726 ang gidaghanon sa namatay lakip niini ang ulahing usa nga nadugang.

Ang siyudad adunay 16,672 ka kaso lakip na niini ang 210 ka bag-ong nadugang diin 3,151 niini ang active cases.

Ang Mandaue City adunay 757 ka active case diin nikabat ngadto sa 3,897 ang total cases sa siyudad lakip niini ang 45 ka bag-ong kaso.

Ang siyudad aduna kini 2,959 ka recoveries lakip niini ang 21 nga bag-ong nadugang  ug 181 ang gidaghanon sa namatay lakip sa usa nga nadugang.

Samtang ang Lapu-Lapu City adunay 644 active cases, 3,832 ang total cases lakip niini ang 40 ka bag-ong kaso.

Ang siyudad adunay 3,070 ka recoveries ug 118 ang gidaghanon sa namatay lakip niini ang usa nga nadugang.

Ang Central Visayas adunay 36,940 total cases; 6,310 ang active cases; 29,090 ang recoveries ug 1,540 ang nangamatay. —BDB (BANATNEWS)