Talisay nakapasar sa DILG evaluation sa road clearing

CEBU, Philippines — Aprubado sa Department of Interior and Local Government (DILG) ang Dakbayan sa Talisay labot sa pagpatuman sa kamanduan nga limpyohan sa mga estraktura ang daplin sa karsada.

Kini human gisuroy sa DILG validating team ang mga barangay sa Talisay kagahapong adlawa.

Si Dr. Neila Aquino, DILG officer sa laing lungsod niingon nga ang mga poste nalang ang ilang nakita nga maoy nakababag sa daplin sa karsada.

Hinuon ginagmay nalang kini nga problema nga mahimo rasab nga matagaan og solusyon.

Iyang nakita ang gihimo nga kausaban sa Local Government Unit (LGU) parti sa mga magpataka og parking ingon man paghawan sa mga estraktura nga naa gitukod sa yuta sa gobyerno.

Si Aquino midugang nga aduna pay mga dokumento nga isumiter aron hingpit nga makuha ang pag aprubar sa DILG sa Syudad sa Talisay.

Usa sa gihimong sumbanan ni Aquino mao ang pagpahiluna ni kapitan Edward Alesna sa Poblacion sa mga manindahay.

Samtang si Alesna sa iyang bahin nalipay sa resulta sa evaluation sa taga DILG ngadto kanila.

Siya niingon nga iya gyud nga gipangitaan og paagi nga dili usab makulban og kaldero ug mawad-an sa ilang pannginabuhi ang mga manindahay.

Ang pag inspeksyon pagahimuon kini sa matag buwan pinaagi sa lokal nga DILG sa Syudad. —MEL (BANATNEWS)