Inmates, mayor nataptan

CEBU, Philippines — Unom ka inmates, mayor, city epidemiologist ug lima ka buwang masuso maoy nadugang sa mga napositibo sa coronavirus dinhi sa Sugbo sa nakalabay nga duha ka adlaw.

Si Cebu City Police Office Deputy City Director for Operations Lt. Col. Wilbert Parilla mibutyag nga unom ka mga piniriso sa Police Station 7 ang nagpositibo sa virus human sila gi-swab test daan ayha pa dad-on sa Cebu City Jail.

Tungod niini, gidid-an una pagpasud og bag-ong dinakpan ang karsel sa maong buhatan samtang nag -decontamination tibuok police station. Giklaro hinoon ni Parilla nga dili ipaubos sa lockdown ang police station, kadto lang mga direct contact sa mga arrested person ang i-isolate ug ipa-swab diretso ang tanang personnel.

Bisan og gi-isolate ang mga personnel sa Station 7 nga direct contact sa unom padayon ang operasyon sa police station.

Si Parilla miasoy ang matag police station dunay gitawag nga station health unit nga maoy nag-monitor sa tanang personnel aron masiguro nga protektado ug dili maigo sa COVID-19 ang mga polis. Sa pagkakaron, dunay 10 ka polis sa CCPO ang positibo sa Covid-19.  Sa pikas bahin, napuno sa listahan sa mga Sugboanong mayor nga natakdan sa maong sakit si Dalaguete Mayor Jeffrey Belciña. Si Belciña nipahibalo niini pinaagi sa Facebook page sa lungsod niadtong Pebrero 22, 2021 nga siya positibon sa Covid-19. Nagtuo siya nga may kalabotan sa iyang trabaho sa lungsod maoy nakapa “expose” kaniya sa Covid-19.

Matud sa mayor nakamatikod siya nga lain iyang pamati maong nagpa-swab test siya ug nasuta nga napositibo na diay kini sa virus. Nag-isolate karon ang mayor ug iyang gipasirad-an iyang buhatan apan abli gihapon ang munisipyo sa katawhan. Si Belciña maoy ika-11 nga mayor sa Sugbo nga natakdan sa Covid-19.

Sa kalabot nga balita, ang pangulo sa City Epidemiology and Surveillance  Unit (CESU) sa Dakbayan sa Lapu-Lapu nga si Grace Chan Carungay napositibo sab sa maong sakit sumala pa ni Mayor Junard Chan.  Matud pa sa mayor nga nagtuo siya nga nakuha sa iyang igsoon ang virus samtang naghimo sa iyang trabaho.

  Si Dr. Agnes Realiza, City Health Department head sa Lapu-Lapu miingon  nga magpadayon sa iyang gimbuhaton si Carunggay bisan na-admit kini sa usa ka pribadong tambalanan.

Si Chan miingon nga  giubo ug naglisod sa pagginhawa si Carunggay maong gidala kini sa tambalanan. Samtang usa ka lima ka buwanng masusong lalaki ang bag-ong napositibo sa coronavirus  sa Dakbayan sa Talisay subay sa nigawas nga resulta sa swab test nga gihimo niadtong Pebrero 21 ning tuiga. Ang maong masuso taga Barangay Tanke. Nianang adlawa 12 ka Talisaynon ang nadugang sa bag-ong kaso. Apan dunay 28 nga nakarekuber sa maong virus.— Le Phyllis Antojado, Romeo Limpangog, Gabriel Bonjoc/IBM (BANATNEWS)