^

Panawagan alang sa mayor

LINTUNGANAY - Fred Languido (Banat) - February 21, 2021 - 12:00am

Taliwala sa padayong pagsulbong sa gidaghanon sa mga kaso sa COVID-19 dinhi sa dakbayan sa Sugbo, gipahibawo ni Mayor Edgardo Labella nga pabilin siyang adto sa iyang panimay mag-opisina.

Sugo kuno ni sa iyang doktor nga dili mogawas sa panimay tungod kay maisip siya nga "immunocompromised."

Ambot unsay hinungdan, wala na siya mohatag pa og detalye. Ang mga tawo nga giisip nga "immunocompromised" ug dilikado nga mataptan og COVID mao kadtong masakiton.

Sama sa mga dunay highblood pressure, diabetic, hubakon, ug dunay mga seryosong balatian sama sa cancer.

Apan way gitug-an si Labella nga seryosong balatian. Ang iya lang gipahibawo sa wala pa siya mohunong og report sa iyang opisina sa City Hall mao nga duna siyay infection sa dunggan.

Nipaubos siya sa tulo ka adlaw nga medical leave samtang nagpaalim kuno sa iyang ear infection.

Apan sukad niadto wala na siya moreport sa City Hall. Sugod niadtong Enero 25 si Labella tua na mag-opisina sa iyang panimay ug wala nay gawasgawas.

Dad-on nalang didto sa iyang pinuy-anan ang mga dokumento nga gikinahanglan niyang pirmahan.

Mo usa ka buwan na nga ingon niini ang kahimtang ni Labella ug tingali panahon na nga iyang sayran ang publiko unsa man gyuy tinuod nga kahimtang sa iyang panglawas?

Daghan na ang mitumaw nga mga tabi-tabi mahitungod sa tinuod niyang kahimtang.

Gani ang uban nisugod na sa panawagan nga angayang moluwat siya sa katungdanan kun dili na siya epektibo sa trabaho.

Usa sa mga nanawagan sa pagresign ni Labella mao si Dr. Rowena Burden.

Sa iyang post sa Facebook sa miaging adlaw, seryoso ang pasangil ni Burden mahitungod sa kahimtang sa panglawas sa mayor ug miawhag siya niini nga mokanaog na sa pwesto.

Wala pay klaro hangtud kanus-a mahuman ang atong problema sa COVID labi pa nga nisaka og balik ang atong mga kaso.

Gani sa report sa DOH niadtong Biyernes, nibalik na og 2,897 ang aktibong mga kaso dinhi sa dakbayan ug duna nay 721 ang nangamatay.

Nagpasabot ba ni nga magpabilin sab si Labella nga adto lang sulod sa iyang panimay hangtud nga mahuman ang iyang termino?

Dako ug daghan ang gimbuhaton nga angayan niyang tutokan nunot niining pandemiya. Apan dili niya kini epektibong mahimo kun tua ra siya sulod sa iyang pinuy-anan kay gidid-an nga makagawas sa iyang doktor.

Busa haum tingali ang panawagan nga kun dili na 100 porsiyento niya nga mahatag ang iyang serbisyo tungod sa balatian mas maayong iyang itugyan ang pagdumala sa dakbayan ngadto ni Bise Mayor Michael Rama.

COVID-19
Philstar
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with