Pag-roving sa suok sa mga barangay gikinahanglan

CEBU, Philippines — Nanawagan karon si Konsehal Philip Zafra ngadto sa mga opisyales sa barangay nga mag-roving sa ilang mga hurisdiksyon ilabi na ang mga suok-suok kay dinha nagbaha ang mga tapok-tapok sa mga tawo ug wala na mosunod sa physical ug social distancing.

Naobserbahan ni Zafra nga dunay mga tawong sige lang og tabi kauban ang ilang mga silingan ug wala kini mopatuman og social distancing ug duna gyuy wala na magsuot og facemask.

“Importante kaayo ang pag-roving sa mga suok-suok. Importante kaayo ang kooperasyon sa atong barangay officials,”nagkanayon si Zafra.

Matud niya dunay ubang tawong ang otoridad ray bantayan ug mamalik dayon kini sa tapok kun wala na ang mga nagbantay.

Tungod niini, gusto ni Zafra nga pangusgan ang surpresa nga mga operasyon.

Nagkanayon si Zafra nga angay usbon kining batasan sa mga tawo nga pirmeng magtapoktapok sa gawas bisan walay hinungdan ug mabalaka unta sila kanunay nga dunay makatakod karon nga virus.

Gipasangil ni Zafra nga kaning mga nangatakboyan sa Covid-19 nga nagpuyo lang sa panimalay ug nituman sa stay home policy biktima sa mga tawo o kabanay nilang maoy magsige og gawas bisan walay hinungdan.

Ning bag-ohay lang gihangop ni Zafra ang self-lockdowns nga gipatuman sa Barangay Guadalupe matag adlaw nga Domingo ug ang estrikto gyung pagpatuman sa quarantine protocols sulod na sa duha ka semana.

Gibalik kining paghigpit sugod niadtong Enero 24,2021 gumikan sa pagsaka sa kaso sa Covid-19 sa ilang dapit. 

Ang maong barangay, aduna karoy 99 ka aktibong kaso.— IBM (BANATNEWS)