Mandaue City nakapangandam na sa ilang vaccination plan

CEBU, Philippines — Hingpit na nga nakapangandam ang kagamhanan sa Dakbayan sa Mandaue alang sa ilang vaccination plan sa COVID-19.

Kini ang gipadayag sa federation president sa Association of Barangay Captain Ernie Manatad kinsa maoy gitudlo ni Mayor Jonas Cortes sa pagpangulo sa ilang vaccination plan sa maong dakbayan.                

Si Manatad kinsa maoy kapitan sa Barangay Subangdaku nagkanayon nga sa niaging semana ilang nahan-ay ang plano alang sa pre-vaccination registration.                             

Ug giumol na usab nila ang vaccination team ug ang identification sa ilang bakunahan ug uban pa. 

Ang vaccine team gilangkuban sa barangay ug city health personnel.

Matud ni Manatad nga ang Management Information System Office (MISO) nakahimo na usab og local link alang sa pagsuporta sa electronic registration sa Department of Health (DOH).          

“Para we can go ahead sa among profiling nag-una-una na lang mi og himo og amo nga link but base on the form distributed by the DOH”, matud ni Manatad.

Gibutyag ni Manatad nga aduna na silay available data sa pag-supply sa  gidaghanon sa local frontliners ug senior citizen.                              

Dugang usab nilang gihimo nga plano mao ang paglambigit sa medical workers ilabi na sa mga health worker nga nagpahigayon og rapid testing sa dakbayan. —BDB (BANATNEWS)