Labella nipakita na sa publiko

CEBU, Philippines — Si Mayor Edgardo Labella nipakita na kini sa publiko sukad sa iyang paggawas gikan sa tambalnan aron pagwagtang sa mga intriga nga lisod ang iyang kahimtang sa panglawas.

Ang virtual press conference ni Labella gi-live kini sa facebook page sa Cebu City Public Information Office ug iyang gipamatud-an nga arang-arang na ang iyang pamati sa panglawas.

Matud ni Labella nga duna lang gyu’y mga tawo nga kusog mohulma og estorya ug iyaha na kining gipasaylo.

Partikular sa intriga nga nasugatan ni Labella nga giingong na-comatose kini.

Nasayran nga ang maong estorya nitumaw dihang wala katambong si Labella sa seremoniya sa pagbukas sa Virtual Grand Sinulog apan iyang gitataw nga niadtong higayona nagpa-checkup siya ug aduna usab siya’y importanteng lakaw.

Sa presscon kagahapon, gibutyag ni Labella nga padayon siya nga nag-work from home ug gitiwas usab niya ang iyang mga antibiotics alang sa iyang ear infection.

“I am okay contrary to what other are saying that I’m in comatose. People can be cruel sometimes but let’s just forgive them”, ni Labella pa.

Dili pa niya matino kanos-a siya makabalik sa city hall sanglit gidid-an pa siya sa iyang doktor nga ma-expose sa daghang tawo.

Nagkanayon si Labella nga naka-trigger sa iyang ear infection mao ang pagduol niya sa daghang tawo.

Nagkanayon si Labella nga bisan naa ra siya sa balay nagtrabaho walay hunong ang iyang komunikasyon sa mga department head ilabi na sa pagtuki sa mga importanteng butang.

Gipaneguro ni Labella nga dili maapektohan ang paghatag sa basic services sanglit maayo ra ang paghupot niini sa nagkadaiyang departamento sa city hall. —BDB (BANATNEWS)