Rama nakurat sa kalit nga anunsiyo ni Labella
CEBU, Philippines — Si Bise Mayor Michael Rama nibutyag nga napupos na ang adlaw sa iyang pagka-acting mayor sa siyudad diin kutob lang kini niadtong Enero 22, 2021.
Si Rama niklaro niini tungod kay daghan gihapon ang nagtuo nga siya gihapon ang acting mayor bisan og nianunsiyo na si Mayor Edgardo Labella nga nibalik na kini sa trabaho diin kasamtangan kining “nag-work from home”.
Nasayran nga nakurat si Rama sa kalit nga anunsiyo ni Labella niadtong Lunes diin nag-estoryahanay pa sila niini niadtong Sabado.
Gibutyag ni Rama nga usa sa gi-estorya ni Labella kaniya mao nga mo-extend kini sa iyang sick leave.
“That matter has to be told kay magtuo nya ang mga tawo nga ako lang gihapon ang acting pagka Sabado, Domingo. Di man ko ma-acting kay wa man ko’y papeles”, ni Rama pa.
Si Rama wala na hinuon kini motawag kang Labella gumikan kay dili siya gusto nga makadisturbo tungod kay ang panglawas maoy prayoridad niini.
Sayo pa, si Labella nipahibawo kini nga sa iyang balay ra siya motrabaho partikular na sa paper works gumikan kay gitambagan siya sa iyang doktor nga dili ma-expose sa daghang tawo.
Si Labella nipasalamat kang Rama gumikan sa maayong paghupot niini sa siyudad sa dihang nalandig siya sa tambalanan tungod sa ear infection. —BDB (BANATNEWS)
- Latest
