Mandaue City Legal Office temporaryong gisirado

CEBU, Philippines — Temporaryong gisirado ang buhatan sa City Legal Office (CLO) sa Dakbayan sa Mandaue gumikan sa pipila usab ka mga kawani niini nga nagpositibo sa COVID-19.                   

Ang mga kawani sa maong buhatan maoy labing bag-o nga nagpositibo sa swab test.

Si Atty. Eddu Ibañez, executive secretary ni Mayor Jonas Cortes nibutyag nga dihang adunay nagpositibo sa mga kawani sa buhatan sa CLO gipatuman ang temporaryong pagsirado niini niadtong Enero 20, 2021.

Samtang ang  silingang mga buhatan sa CLO ang lakip usab sa gisirado sulod lang sa tulo ka oras nga gidugayon human sa gipahigayon nga disinfection sa mga personnel sa City  Disaster Risk Reduction and Management Office.

Naglakip sa mga buhatan nga gi-disinfect mao ang City’s Public Information Office (PIO), Bids and Awards Committee (BAC) Office ug Housing and Urban Development Office (HUDO).

Nunot sa gipatuman nga temporaryong pagsirado sa  CLO ug Office of the Building Officials (OBO), si Ybañez nagkanayon nga kasamtangan pa karon nilang gipaabot ang rekomendasyon sa  Emergency Operation Center (EOC) sa siyudad diin gipaabot pa ang paggawas sa resulta sa swab test sa uban pa nga mga kawani niini.

Dugang ni Ybañez  nga tungod sa nasinati nga mga kasao sa COVID-19  sa  pipila ka mga kawani sa siyudad maoy ilang gihimo ang pagluwat og memorandum isip pagsagop sa work-from-home scheme sa pipila ka mga kawani sa city hall ilabi na niadtong mga senior citizen. —BDB (BANATNEWS)