50 ka mga polis i-apil sa contact tracing team

CEBU, Philippines — Dili mominos sa 50 ka mga police sa Cebu City Police Office ang ibutang na usab sa contact tracing team.

Kini ang gitug-an sa Deputy Director for Operations Police Lt. Col. Wilbert Parilla nga nahinabi sa mga tigbalita.

Matud pa ni Parilla, human sa pagsaka na usab sa kaso sa COVID-19 sa Dakbayan sa Sugbo, dili mominos sa 50 ka mga police ang ila na usab ibutang sa Emergency Operations Center isip kabahin sa contact tracing team.

Ang maong mga police mao usab ang kanhi contact tracing team sa dihang taas usab ang kaso sa covid-19 sa nilabay nga tuig dinhi sa siyudad. Sumala pa ni Parilla, mo request na usab sila sa Police Regional Office 7 ug augmentation force susama sa gidaghanon sa police nga ilang gibutang isip contact tracing team

Nasayran nagpadayon na usab karon ang kapulisan sa pagbantay sa mga barangay control points uban sa mga barangay tanod.

Awhag ni Parilla sa katawhan nga padayon lang gihapon mosunod sa health protocols sama sa pagsul-ob ug facemask, social distancing ug uban pa aron malikayan ang COVID-19. —MEL (BANATNEWS)