“Dangerous drugs” gipaagi sa post office
CEBU, Philippines — Dili mominos sa P2.3 milyones nga balor sa gikonsiderar nga ‘dangerous drugs’ ang na recover sa mga operatiba sa Philippine Drug Enforcement Agency 7 uban ang kapulisan ug Philippine Postal Corporation-7 gikan sa mga wala mahatud nga mga padala nga gibutang diha sa Mandaue Central Post Office niadtong Martes.
Samtang didto sa Dumaguete City, usa ka lalaki sab ang nasikop human nakuhaan og tunga sa kilong gidudahang shabu.
Sa PPC-7, kasagaran sa mga nasakmit mga regulated anti-depressants ug pain relievers gikan sa dili mominos 20 ka mga return to sender parcels, nga schedule na unta ipangdispatsar human ang mga sender wa na igkita.
Ang maong mga butang gideklarar nga souvenir items, tools ug duwaan apan nagduda ang PhilPost maong nakig-alayon sila sa buhatan sa PDEA-7 ug didto nasayran nga mga klase-klaseng regulated anti-depressant ug pain reliever drugs ang sud sa mga kargamento.
“As per Republic Act 9165, “dangerous drugs” are “those listed in the Schedules annexed to the 1961 Single Convention on Narcotic Drugs, as amended by the 1972 Protocol, and in the Schedules annexed to 1971 Single Convention on Psychotropic Substances,” sumala pa sa pamahayag sa PDEA-7. Matud pa ni Leia Albiar-Alcantara, tigpamaba sa PDEA7, base sa pamahayag sa Phil Post ang maong mga parcels wala na mauli ngadto sa mga nagpadala niini human nga walay nidawat nga gipadalhan.
Base sa protocol sa Phil Post kung dili na ma-deliver ug dili makita ang sender ikonsiderar kini nga iglalabay na.
Sa pikas bahin, 37-anyos nga lineman/driver ang gisikop sa mga sakop sa PDEA-7 human nasakmitan og ginadiling drugas diha sa Barangay Banilad, Dumaguete City, Lunes sa gabii.
Ang nasikop mao si Ronald Japon, taga Mangnao, Dumaguete City, Negros Oriental. Nasakmit gikan kang Japon ang mga pinutos sa ginadiling gituohang shabu nga may gibug-atong 500 gramos.
Nasakmit gikan niya ang buy bust money, motor, cellphone, ID ug resibo sa money remittance center.— IBM (BANATNEWS)
- Latest
